بحبك يا مصر بحبك رغم إنك!!

بحبك يا مصر..بحبك رغم انك!!

مصر؟! مصر دى عشقى الأول والأخير

مصر دى جنه..وناس مليانه خير

مصر البهيـــه..مصر الأبيــــه

هى اللى عانت وقاست كتـــير

تعيش جوه قلبى هى الأميــرة

ولكن للأســف..خانها الأميــر

بحبك يا بلدى

بحب ابتسامتك

بحب هواكى وضلك وقمرك

ولو قالوا عنك انك غريبه..هقوللك بحبك

بحبك تنادى باسمى عليا

وتشاورى ليا

وتقولى انى ابنك

واجرى عليكى..اضمك بشوقى

وشوقك ياخدنى..يطبطب عليا..

واقوللك بحبك ...

بحبك يا بلدى... بحبك رغم انك...!!

بحبك نسمة ساعة العصارى

وبسمه رقيقه من وش جارى

وقعدة صحاب..ولمة جيران

وصوت ضحكه صافيه تدفى المكان

واحبك حبيبه تنادى لحبيبها

تضميه ف حضنك..

يقوللك بحبك..

عيونك تجاوب..

وصوتك يا غالية

ليه عنه غايب

وبرجع واقوللك ..هيفضل يحبك

واحبك يا بلدى..احبك رغم انك..!!

ليه يا دنيا

ليه يا دنيا بقيتى كده؟!
قاسية علينا بالشكل ده!
و ف حبنا ليه متردده!

تبيعينا ليه ف نص الطريق
وتفرقينا...تتوهينا
وتبعدينا عن شئ برئ
عن شئ جميل بالنسبه لينا..قشة غريق

ف عز الفرحة..بتكسرينا
بتحبطينا....تعاندى فينا
يمكن بنضحك..جايز بنعشق..
بس قلوبنا عارفه انك لسه شايله الدمعه لينا

بيقولوا طول عمرك كده..
وانتى قاسية وظالمة كده
بتجرحى..ولا بتداويش
بتدبحى..ولا تندميش
وتشيلى فينا..تحطى بينا..ماتتعبيش

وبرغم كل القسوة دى..
بنقول رضينا..
وبرغم كل الظلم ده..
بشوف ف قلبك ذرة حب لسه لينا..مش علينا..
بس انتى لسه متردده

ليــــــــــه يا دنيا بقيتى كده؟!
قاسيه علينا بالشكل ده!!
و ف حبنا ليه متردده...